తెలంగాణలోని ఉమ్మడి మెదక్ జిల్లాలో కలకలం రేపిన ఘటన వెలుగులోకి వచ్చింది. Meligiripet గ్రామ శివారులోని పంట పొలాల్లో 20 మొసలి పిల్లలు కనిపించడం స్థానికులను భయాందోళనకు గురిచేసింది.

సోమవారం గ్రామ శివారులో పశువులను మేపేందుకు వెళ్లిన కాపరులకు ఈ మొసలి పిల్లలు కనిపించాయి. వెంటనే వారు అటవీశాఖ అధికారులకు సమాచారం అందించారు. ఘటనాస్థలికి చేరుకున్న అధికారులు మొసలి పిల్లలను సురక్షితంగా పట్టుకున్నారు.

పరిశీలనలో భాగంగా సమీప ప్రాంతాల్లో తనిఖీలు నిర్వహించిన అధికారులు దాదాపు 60 మొసలి గుడ్లను కూడా గుర్తించారు. అనంతరం మొసలి పిల్లలతో పాటు గుడ్లను కూడా Manjira Wildlife Sanctuary పరిధిలోని మొసళ్ల సంరక్షణ కేంద్రానికి తరలించారు.

అయితే, మెలిగిరిపేట ప్రాజెక్టు పరిసర ప్రాంతాలు, సమీప చెరువుల్లో పెద్ద సంఖ్యలో మొసళ్లు ఉండే అవకాశం ఉందని అటవీశాఖ అధికారులు అనుమానం వ్యక్తం చేస్తున్నారు. దీంతో అప్రమత్తమైన అధికారులు ఆ ప్రాంతాల్లో మరింత నిఘా పెంచారు.

దాదాపు 20 మొసలి పిల్లలు, 60 గుడ్లను సురక్షిత ప్రాంతానికి తరలించడంతో పరిసర గ్రామాల ప్రజలు, రైతులు ఊపిరి పీల్చుకున్నారు. అయితే నీటి వనరుల సమీపంలో సంచరించే సమయంలో ప్రజలు జాగ్రత్తలు పాటించాలని అటవీశాఖ సూచించింది.