విశాఖపట్నం స్టీల్ ప్లాంట్లో సోమవారం చోటుచేసుకున్న ఘోర ప్రమాదంపై ప్రధానమంత్రి నరేంద్ర మోదీ తీవ్ర దిగ్భ్రాంతి వ్యక్తం చేశారు. ఈ ప్రమాదంలో ప్రాణాలు కోల్పోయిన కార్మికుల కుటుంబాలకు ప్రగాఢ సానుభూతి తెలిపారు. గాయపడిన వారు త్వరగా కోలుకోవాలని ప్రార్థిస్తున్నట్లు పేర్కొన్నారు. బాధితులకు అవసరమైన అన్ని సహాయ సహకారాలు అందించేందుకు స్థానిక అధికారులు చర్యలు తీసుకుంటారని తెలిపారు. ఈ మేరకు ప్రధాని మోదీ సామాజిక మాధ్యమం ‘ఎక్స్’ వేదికగా స్పందించారు.
విశాఖ స్టీల్ ప్లాంట్లోని స్టీల్ మెల్టింగ్ స్టేషన్-2 విభాగంలో విధులు నిర్వహిస్తున్న సమయంలో ఈ ప్రమాదం చోటుచేసుకుంది. మోల్టెన్ మెటల్ ల్యాడల్కు అనుసంధానమైన బకెట్లు ఒక్కసారిగా కుప్పకూలడంతో ల్యాడల్లోని ద్రవ లోహం కిందపడింది. దీంతో అక్కడ పనిచేస్తున్న కార్మికులు తీవ్రంగా గాయపడ్డారు.
ఈ ఘటనలో ఎనిమిది మంది కార్మికులు అక్కడికక్కడే మృతి చెందగా, మరో ఏడుగురు గాయపడ్డారు. క్షతగాత్రులను ఆస్పత్రికి తరలించి చికిత్స అందిస్తున్నారు. ప్రమాదం నేపథ్యంలో ప్లాంట్లో విషాదఛాయలు అలుముకున్నాయి.
ఈ ఘటనపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు కూడా తీవ్ర విచారం వ్యక్తం చేశారు. ప్రమాద వివరాలను అధికారులతో ఫోన్ ద్వారా తెలుసుకుని పరిస్థితిని సమీక్షించారు. మృతుల కుటుంబాలకు సానుభూతి తెలియజేసిన సీఎం, గాయపడిన వారికి అత్యుత్తమ వైద్య సేవలు అందించాలని అధికారులను ఆదేశించారు. అలాగే ప్రమాదానికి దారితీసిన కారణాలపై సమగ్ర విచారణ చేపట్టాలని సూచించారు.
