ఆంధ్రప్రదేశ్ రాజకీయాలను కుదిపేస్తున్న మద్యం కుంభకోణం కేసులో కీలక పరిణామాలు చోటుచేసుకుంటున్నాయి. ఈ కేసులో మాజీ ముఖ్యమంత్రి, వైసీపీ అధినేత Y. S. Jagan Mohan Reddy వ్యక్తిగత సహాయకుడిగా పనిచేసిన కేఎన్‌ఆర్‌ను ప్రత్యేక దర్యాప్తు బృందం (సిట్) అధికారులు మరోసారి విచారణకు హాజరుకావాలని ఆదేశించారు. దీంతో ఆయన గురువారం విచారణకు హాజరయ్యారు.

ఇప్పటికే బుధవారం కూడా సిట్ అధికారులు కేఎన్‌ఆర్‌ను పలుమార్లు ప్రశ్నించినట్లు సమాచారం. ఈ విచారణలో పలు కీలక అంశాలు వెలుగులోకి వచ్చినట్లు తెలుస్తోంది. ముఖ్యంగా మద్యం కుంభకోణానికి సంబంధించిన ఆర్థిక లావాదేవీలు, లిక్కర్ ముఠాతో ఉన్న సంబంధాలు, అనుమానాస్పద ఒప్పందాలపై అధికారులు లోతుగా ఆరా తీస్తున్నట్లు సమాచారం.

సిట్ దర్యాప్తు ప్రకారం.. లిక్కర్ మాఫియా మరియు కీలక రాజకీయ నాయకుల మధ్య కేఎన్‌ఆర్ కీలక వారధిగా వ్యవహరించినట్లు అనుమానాలు వ్యక్తమవుతున్నాయి. ఈ నేపథ్యంలో రెండోరోజు విచారణ మరింత కీలకంగా మారింది. అధికారులు అడుగుతున్న ప్రశ్నలకు కేఎన్‌ఆర్ సమాధానాలు ఇస్తున్నప్పటికీ.. కొన్ని అంశాల్లో స్పష్టత కోసం ఆధారాలను పరిశీలిస్తున్నట్లు తెలుస్తోంది.

ఇవాళ సాయంత్రం వరకు విచారణ కొనసాగనున్న నేపథ్యంలో.. అనంతరం కేఎన్‌ఆర్‌ను అరెస్ట్ చేసే అవకాశం ఉందంటూ రాజకీయ వర్గాల్లో పెద్ద ఎత్తున ప్రచారం జరుగుతోంది. అయితే అధికారికంగా మాత్రం సిట్ ఎలాంటి ప్రకటన చేయలేదు.

ఇప్పటికే ఈ మద్యం కుంభకోణం కేసు రాష్ట్ర రాజకీయాల్లో తీవ్ర దుమారం రేపుతోంది. అధికార, ప్రతిపక్ష పార్టీల మధ్య ఆరోపణలు, ప్రత్యారోపణలు కొనసాగుతుండగా.. ఈ కేసులో మరికొంతమంది కీలక వ్యక్తుల పేర్లు కూడా బయటకు వచ్చే అవకాశం ఉందని రాజకీయ విశ్లేషకులు భావిస్తున్నారు. సిట్ దర్యాప్తు వేగవంతం కావడంతో ఏపీ రాజకీయాల్లో ఉత్కంఠ మరింత పెరిగింది.